З рэзервовага фонду прэзідэнта накіруюць 130,6 млн рублёў на выплаты для асобных катэгорый работнікаў бюджэтных арганізацый, паведамляе БЕЛТА. Аднак вылучэнне гэтых сродкаў, як вынікае з заяваў чыноўнікаў, не азначае, што бюджэтнікі атрымаюць прыбаўку. Грошы вылучаць на ўжо прынятыя раней рашэнні, то-бок гаворка ідзе не пра чарговую прыбаўку да заробкаў, а пра пакрыццё выдаткаў на павялічаныя раней выплаты.
Нагадаем, сёлета чыноўнікі некалькі разоў павышалі базавую стаўку, да якой прывязаныя заробкі бюджэтнікаў. Рост быў у тым ліку ў студзені і верасні. Таксама для медыкаў у ліпені ўвялі новую надбаўку, але адмянілі кавідныя даплаты. Яшчэ сёлета ўвялі дадатковыя стымулявальныя выплаты для выхавальнікаў і іх памочнікаў.
Як паведамляецца, 130,6 млн рублёў, якія плануюць вылучыць з рэзервовага фонду, збіраюцца пусціць якраз на прынятыя раней рашэнні па павышэнні заробкаў бюджэтнікам. Сродкі накіруюць бюджэтам абласцей і асобным органам і арганізацыям, што фінансуюцца з рэспубліканскага бюджэту.
Урад найбліжэйшым часам мусіцьпрыняць адпаведную пастанову.
Раней чыноўнікі дапускалі, што з гэтага фонду возьмуць грошы на павышэнне заробкаў бюджэтнікам, дзяржслужбоўцам, а таксама на пенсіі вайскоўцаў, «асоб начальніцкага і шараговага складу органаў і падраздзяленняў» і будаўніцтва некаторых аб’ектаў. А яшчэ — на выплаты надбавак медыкам за працу з пацыентамі з каранавірусам (але кавідныя надбаўкі адмянілі з 1 ліпеня гэтага года).